Ritual Entrega Kna’ar ba Diretor Foun

Ita iha Colégio de Sto. Inácio de Loiola, seidauk iha tradisaun formal kona ba ritual entrega kna’ar ba Diretor foun. Iha 09 de Maio de 2016, iha okazaun enkontru inan-aman, loron Sabado ida, Amu Weyms simbolikalmente entrega xave odamatan Gabinete nian.

Ha’u mak Diretor datoluk. Ha’u deside atu halo ritual simples ida ne’e hanesan formalitas no kapas mos ba ita komunidade tomak asiste transisaun.

Iha momentu ida ne’e, dala ida tan ha’u agradese ba tinan 4 ne’ebé ha’u kaer kna’ar nu’udar Diretor da Eskola CSIL. Maski tempu badak, akontese buat barak, bensaun bara-barak. Ha’u agradese ba oportunidade atu servi no hadomi.

Iha momentu historiku ida ne’e ha’u hakarak entrega kna’ar ba Diretor foun liu husi simbolu rua, xave no buku relatoriu.

Xave mak simbolu ba kna’ar, poder, mandatu no lideransa. Hanesan Diretor da Eskola, nia mak sei asegura katak atividade loron-loron eskola nian tenki lao ho diak. Nia tenki uza nia talentu, energeia, imaginasaun, esforsu no kapasidade hotu-hotu atu loke dalan ba aprendizajen lolos atu akontese iha eskola.

Buku Relatoriu mak simbolu ba servisu, responsibilidade, jestaun, no administrasaun. Hanesan Diretor da Eskola nia sei hakerek dokumentos barak: planu, avizu, relatoriu, regras, avaliasaun, promosaun, ligasaun, supervisaun, manutensaun, bolu atensaun, sanksaun, no barak tan.

Diretor da Eskola nia misaun mak atu lori eskola ba oin. Nia ukun atu servi. Gabinete ida ne’e mak sai sentru ba ligasaun entre sektor barak: Jesuita, doador, inan-aman, professor, staff, estudante, alumni, vizinhu, belun no inklui mos inimigu sira.

Misaun Diretor da Eskola nian mak furak tebes no oportunidade diak atu tau matan laos deit uma maibe importante liu mak ema sira iha laran. Kapas los atu asiste no haree ho matan rasik oinsa labarik ida sai maduro, no professor ida sai desenvolvidu iha ninia profisaun.

Ha’u la lakohi aumenta tan, ha’u konvida, Diretor foun, Padre Isaias Abílio Caldas, S.J., atu hakat mai oin, atu simu presenti no responsabilidade, sai Diretor dahaat Colégio de Sto. Inácio de Loiola.

Outgoing School Director