Bainhira Santo Inácio de Loiola deside atu husik sasan hotu mundu nian, Santo Inácio entrega nia Surik ba Nain Feto iha Montserrat hodi hahu nia peregrinasaun – caminhada hodi prova Maromak nia bolu. Hanesan konvite ida mai ita hotu liu-liu iha fulan Maio ida ne’e, mai ita fiar iha Maria hodi intersede ita-nia orasaun ba too Jesus, no fiar iha espíritu Restaurasaun Independénsia nian hodi nafatin iha esperansa ba jerasaun foun (Gen Z), ho fiar ne’ebé sira iha la lakon sira-nia esperansa hodi sai kontinuador ba nasaun ida ne’e no iha kompromisu atu hamoris nafatin valór sira independénsia nian no kontribui ba futuru.
Hafoin remata atividade sira iha fulan Abril kotuk, Colégio Loiola kontinua ho atividade normal, hahu fulan Maio ho Banda Loiola ne’ebé hetan Segundu Lugar iha kompetisaun High School Battle of the Band ne’ebé organiza husi KLAN Entertainment, kompete ho eskola secundário rua seluk Colégio Loiola konsege okupa iha Segundu Lugar, aprezentasaun ne’ebé hatudu husi estudante sira reflete sira nia domin ba múzika no sira nia hakarak atu hatudu espiritu Magis iha kompetisaun ida ne’e. Maski sira hetan segundu lugar, sira sei sai nafatin vensedór iha Loyolans nia fuan, tamba ida ne’e la’ós kona-ba manán, maibé kona-ba oinsa aprende lisaun sira liu husi esperiénsia durante preparasaun iha ensaio sira, liuliu importánsia hosi serbisu iha ekipa.
Rekoleksaun mak momentu oportunu ida atu passa tempo ho ita nia aan iha silensiu nia laran, silensiu ne’ebé lori ita iha orasaun hodi konvoka konversa profundu ida ho Nai Maromak, atu nune’e ita bele reflete no haré fila fali momentu hotu ne’ebé ita passa ona no mós grasa konsolasaun/desolasaun ne’ebé ita simu ona. Nune’e iha fulan ida ne’e rekoleksaun ikus ba turno Sonhadores de Loiola ho tema Men and Women for Others: Vocation and Mission Sent to Serve, tulun estudante sira oinsa sai Mane no Feto ba Ema Seluk, ho valor Ináciano ne’ebé sira aprende ona oinsa sira bele lori ida ne’e iha sira-nia kareira no haré ida ne’e hanesan sira vokasaun no misaun ida, rekoleksaun ne’e halao iha Montserrat, Kasait iha loron 9 fulan maio.
Hafoin de Timor-Leste selebra loron Restaurasaun Indenpendensia iha loron 20 fulan maio tinan 2026, Colégio Loiola kontinua komemora iha loron 21 fulan maio tinan 2026. Iha ne’ebé organiza husi estudante LOYOLA WOLVES no professor responsavel sira, atividade ne’e halao loron tomak no iha apresentasaun oin-oin husi estudante sira, drama história timor no música.
Iha oportunidade ida ne’e apresenta mós discursu konaba Sentidu Restaurasaun Independénsia ba Jerasaun Gen Z husi estudante Cecilia Febronia de Nola Maia da Costa classe da-11 turma C, nia hateten “Independénsia Timor-Leste mak rezultadu husi luta no sakrifísiu husi ita-nia herói sira ne’ebé fó-an ba rai doben ida ne’e. Ba jerasaun Gen Z, restaurasaun independénsia la’ós deit selebrasaun, maibé oportunidade atu komprende valor liberdade no responsabilidade atu kontinua dezenvolve nasaun. Ohin loron, Gen Z la presiza luta ho arma, maibé presiza luta ho konesimentu, edukasaun, disiplina no karakter. Ami tenke uza liberdade atu halo buat di’ak, preserva ita-nia kultura no identidade, no hamutuk harii Timor-Leste ida ne’ebé dame, forte no iha futuru naroman.”
Antes distribui kaderneta Períodu Dahuluk, Colégio de Loiola halao mós deliberasaun valor akademiku hodi tetu no discerne avaliasaun ne’ebé justo no responsavel. Iha loron 23 fulan maio 2026, Diretór do Colégio hamutuk ho Vice-Diretor Assuntu Akademiku no profesór sira halao encontro deliberasaun valor iha Colégio de Loiola. Enkontru ida ne’e nia objetivu mak atu apresenta, analiza no diskute hamutuk rezultadu akademiku estudante sira durante Períodu Dahuluk.
Liuhusi deliberasaun ida ne’e, profesór sira iha oportunidade atu haree no avalia progresu estudante sira ho kle’an, konsidera aspetu akademiku no dezenvolvimentu pessoal estudante ida-idak nian. Prosesu ida ne’e ajuda garante katak valor sira ne’ebé atribui ba estudante sira reflete ho loloos sira-nia esforsu, partisipasaun no rezultadu aprendizajen durante períodu ne’e.
Deliberasaun valor mak momentu discernimento comunitário hodi haré kada estudante ninia kreximento no desafiu sira, nune’e la’ós deit atividade administrativu ida, maibé mós espasu ba refleksaun no kolaborasaun entre ekipamentu edukativu sira atu kontinua melhora qualidade ensinu no aprendizajen, tuir espiritu edukasaun integrál ne’ebé Colégio de Loiola promove – “A student’s grade in one subject makes full sense When seen in relation to performance in other subjects”.
Nune’e Colégio de Loiola konklui Fulan maio ho distribuisaun kaderneta Períodu Dahuluk ba estudante sira iha loron 30 fulan maio 2026.
Loron ne’e hahú ho Eukaristia Santa hodi agradese ba Maromak tanba ita konsege konklui ho di’ak atividade hotu iha Períodu Dahuluk no atividade durante Fulan Maio. Iha misa ne’e, komunidade Loiola tomak fó agradesimentu ba bênsaun, aprendizajen no esperiénsia sira ne’ebé hetan ona, inklui momentu konsolasaun no dezolasaun sira ne’ebé ajuda forma no hametin estudante sira iha sira-nia dalan moris no aprendizajen.
Iha okaziaun ida ne’e, estudante sira – String de Loiola mós halo apresentasaun muzikál badak ida hodi hato’o sira-nia agradesimentu ba inan-aman sira, profesór sira no ema hotu ne’ebé direta ka indireta fó apoiu durante prosesu edukasaun. Ita boot sira-nia dedikasaun, komprimisu no suporta kontinua sai hanesan força boot ida ne’ebé ajuda estudante sira atu dezenvolve sira-nia talentu, kapasidade no atinji susesu iha área oioin.
Momentu ida ne’e la’ós deit oportunidade atu simu rezultadu akademiku, maibé hanesan konvite ida hodi konvida ita hotu atu reflete kona-ba dalan ne’ebé ita liu ona, agradese ba buat di’ak sira ne’ebé hetan, no prepara-an ho esperansa foun atu kontinua Períodu Daruak ho espiritu foun.
Leave a Reply