Colégio de Loiola hahú viajen akadémika foun ida-ne’e ho fuan agradesidu, hodi permite armonia atu inspira ami nia hanoin hodi orienta ami nia servisu no asaun sira, atu buat hotu ne’ebé halo ba Maromak nia gloria. Kompleta ona fulan Janeiru, agora kontinua ba Fevereiru ho oráriu ida ne’ebé dinámiku no mudansa sira iha prosessu aprendizagem. Ho oráriu foun, estudante sira aprende atu adapta, no sira sente kontente tebes ba viajen ne’ebé iha oin.
Onra boot ida ba Colégio de Loiola simu Elisabeth University of Music husi Hiroshima, Japaun, iha Colégio ida ne’e. Sira nia apresentasaun muzikál ne’ebé furak no toka ami nia fuan no halo ami relembra katak múzika maka linguajen universál domin no esperansa nian. Liu husi sira nia melodia, ami esperiénsia unidade, ksolok, no espíritu edukasaun Jesuíta nian ne’ebé enkarna iha ami-nia aan.
Hamutuk ho atividade sira ne’e, ami mós selebra loron domin nian ho tema “Amor demonstrado em ações, não em palavras.” Ami nia estudante sira selebra hamutuk ho profesór no funsionáriu sira, hodi espresa domin liu husi asaun konkretu sira envezde liafuan de’it. Hanesan Santu Inácio de Loyola hakerek iha Ezersísiu Espirituál sira: “Domin tenke konsiste liu iha hahalok duké iha liafuan” (EE, 230). Prinsípiu ida-ne’e fó hanoin mai ita katak domin loloos hatudu liuliu liu husi servisu no laran-luak.
Tuir selebrasaun ida-ne’e, estudante sira aprezenta fashion show, ne’ebé maka hatudu estudante hotu ninia kriatividade no entuziazmu. Colégio hato’o parabéns ba estudante hotu ne’ebé partisipa, liuliu sira ne’ebé simu prémiu ba sira nia dezempeñu.
Fulan ida-ne’e mós marka inísiu ba époka Kuarezma nian ho selebrasaun Misa Kuarta-feira Cinzas nian, momentu profundu ida orasaun nian, silénsiu nian, no konversaun fuan nian. Bainhira ita simu ahi-kadesan sira tulun ita reflete konaba: “Hakribi sala no fiar iha Evanjellu.” Quaresma mak tempu oportunu ida atu ita sai honestu iha ita-nia relasaun ho Maromak. Tamba Nai hatene ita-nia frakeza sira, tentasaun sira no luta sira. Tamba ne’e iha Quaresma, “Na’i dehan nune’e: ‘Fila mai Ha’u ho imi nia fuan tomak, ho jejún, orasaun no karidade.’” Profeta Joel fó hanoin mai ita katak Maromak hakarak la’ós de’it jestu sira iha li’ur, maibé fuan ne’ebé konverte. Testu ida-ne’e mak konvite ida atu fila fali ba Na’i ho laran-metin, hodi fiar katak Nia rona Ninia povu nia lian no nafatin hein ba sira ne’ebé fila fali ba Nia.
Nu’udar komunidade inasiana, ita la’o hamutuk durante tempu preparasaun ba Páskua ida-ne’e, hodi buka no halo MAGIS iha aspetu hotu-hotu moris loroloron nian: iha familia, iha servisu, iha amizade, iha estudu, no iha kuidadu ba ita-nia maluk. Atu tempu Quaresma ida-ne’e tulun ita atu hakbesik liután ba Maromak no moris iha prisipiu ida Ad Maiorem Dei Gloriam.
Hafoin semana okupadu ida-ne’e, estudante sira kontinua ho sira nia ezame médiu ba semestre dahuluk. Nune’e periodo ida ne’e hanesan esperiensia foun ba estudante klasse da-7 no klasse da-10 hanesan Claricia husi klasse da-7 turma A partilha:
“Tinan ida ne’e marka ha’u nia viajen foun nu’udar estudante iha Loiola, bainhira seidauk hahu eskola iha ne’e ha’u rona esperiensisa barak husi kolega sira ne’ebé eskola ona iha Loiola, sente priviléjiu bele hola parte iha komunidade ida ne’e, ohin hanesan loron primeiro ha’u hahu exame iha Loiola espera ha’u hetan valor ne’ebé di’ak. Kontente liu tan bainhira professora hili ha’u hodi toka violinu, apresenta iha palku leten, ha’u sente tauk uitoan tanba ha’u toka apresenta iha amu diretór no estudante husi Elisabeth University of Music no kolega hotu nia oin, maibé desafiu ne’e liu ho di’ak tanba hetan apoiu husi ha’u-nia ekipa. Ho tulun professor sira nian, ha’u sai fiar-an liután, ikus liu ha’u espera ha’u bele krexe liu tan iha Loiola”.
Liu husi partilha ida ne’e espera estudante hotu hakarak atu aprende no partilha ba malu buat di’ak hotu ne’ebé sira aprende ona iha Colégio ida ne’e, atu sira krexe iha fiar no domin no ikus mai sira bele tulun di’ak malu di’ak liu tan.
Leave a Reply to Cipriano Madeira Cancel reply